رفعت راسا عن فنجان القهوة وقالتلو بحزم وثقة بالنفس
ممكن تحكي شو بدك مني وبدون حركات وتلميحات
طولي بالك ليش عصبتي جاييكي بالحكي
ماعصبت بس ما بحب اللف والدوران اصلاً مابعرف ليش قبلت اجي معك وانا يادوب صرلي كم ساعة بعرفك.. لا وما بعرف عنك غير اسمك كمان
طولي بالك لا تدايقي مني لو سمحتي اسمعيني انا بدي مصلحتك صدقيني
اتفضل احكي وخلصني مابقدر طول اكتر من هيك
القصة وباختصار عالية مابدك هالشغل ولا هالزلمة بعدي عنو تماماً واعتبري حالك لا اجيتي ولا عرفتيه
ليش؟
لانو مو نضيف ومو دغري وبيلعب بنات الناس وكذاب لافي برنامج ولا بطيخ
طيب وشو مشان انت رفيقو من الروح للروح؟!!! مو لازم دير بالي منك انت كمان وما كون قاعدة معك هلأ؟؟؟ لانو كل حدا فينا بيختار رفيقو ع شاكلتو ويكون بكملو بكل شي
لاااا انتي فهمتي القصة غلط او اخدتي بالظاهر
شلون يعني ممكن تشرحلي
هلأ هو ممثل درجة عاشرة
اي عرفتو اول ما شفتو تذكرتو بس ما بيطلع كتير كومبارس كأنو..
اي هيك شي
طيب كمل انو شو دخل هالشي بموضوعنا
جاييكي بالحكي اصبري شوي يا لطيف شو بصلتك محروئة...
اتفضل كمل
هادا يا ستي هادا الزلمة يلي اسمو زهير ناصب ع كذا حدا ولامم عملة وفتح هي الشركة مشان يصطاد فيا خواريف للنصب وبنات للكيف وكل هالشي عم يعتمد فيه ع اسمو انو هو ع اساس ممثل ومعروف وهو خرطي نص كم اصلاً كومبارس وما حدا بيعرفو استغربت كيف عرفتيه انتي...
عرفتو لاني كنت عم بتفرج ع مسلسل من كم يوم كان طالع هو فيه بكم مشهد صغار وكنت عم قول ولي شو غليظ وما بيعرف يمثل ولما اجيت ع الشركة وشفتو انصدمت كتير واجتني الضحكة كمان بس مسكت حالي وحتى ما حسستو اني عرفتو بالمرة وبعتقد هو ادايق من هالشي لان كان كل الوقت عم يحاول يطلع فيني نظرات ويعملي حركات يذكرني بحالو هههه ما هضمتو ولا ارتحتلو بالمرة....
بس معلش سؤال
اتفضلي مع اني بعرف شو رح تسالي
انت شو لمك ع هيك واحد نصاب وليش عم تجي لعندو وعاملو رفيقك طالما هو نصاب ووسخ وكذاب وحرامي وووو؟؟
هادا يا ستي انا لا رفيقو ولا هو بيعنيلي بشي بس القصة ومافيا انو هو مكتبو تحت بنايتي واتعرفت عليه لمت كان عم يستأجر المكتب ببنايتنا من رفيقي يلي ماسك قصة الاجارات بالبناية وساعتا طلب منا انا ورفيقي نساعدو ونلاقيلو شباب وبنات بدون يشتغلو وانو بدو نصوص ينتجا... طبعاً انا ورفيقي طار عقلنا لانو بدنا فرصة متل هي لانو نحنا الاثنين عنا الكتابة من زمان وما حدا عم يعترف فينا.. المهم قدمنالو شي من كتاباتنا وهو طار عقلو وطلب انو يكون النا مكتب ثابت بشركتو يعني متل ورشة كتابة ونكون انا ورفيقي مشرفين عليها.. باختصار طمبرنا
هالحكي صرلو تلت اشهر بس ونحنا كنا متفانين بالشغل وعم نبذل جهدنا بس اكتشفنا كذبو والاعيبو وانو ضحكان ع نص البلد قررنا نضل لحتى ناخد حقنا من بين عيونو ونلعن فاطسو وصزنا كل ما يجي حدا بدو يشتغل معو ويشاركو نروح نلف من وراه ونحكيلو انو ينفد بريشو لانو هالزلمة نصاب ونحكيلو تاريخ زهير الوسخ وهداك يفركا ويا فكيك... وزهير يجن وما يعرف ليش عم يطفشو هالعالم ونحنا مستفيدين لانو عم نتعرف ع ناس بحبو الفن وبدون ينتجو مسلسلات يعني عم يصير عنا امل عرفتي كيف...
طيب وشو خلاك تلحقني وتحذرني منو..
ليكي انا كل البنات حذرتا منو اصلاً لانو اي وحدة بعتبرا اختي بس ولا وحدة شرحتلا تفاصيل واصلاً في منون ما عجبون حكيي بلعكس كملو معو..
كيف يعني كملو معو؟؟؟
خلص افهميا لحالك كملو طريقن معو متل ما هو بدو يعني طلع ما عندون مشكلة بالعكس طلعو هنن متلو...
طيب ليش شرحتلي الي؟
بتصدقي اذا التلك حبيتك من اول نظرة وحسيتك قطعة مني وحسيت حالي مسؤول عنك وعن سلامتك...
عالية انصدمت وحست بمشاعر خوف وفرح واستغراب ممزوجين مع بعض...
شبكي سكتي ردي قولي شي
شو قول يعني
اي شي عيطي خانقي بهدليني امسحي فيني الأرض حتى..
لا ليش انا ما بتصرف بهي الطريفة
ابتسم بفرح: الحمد لله معناتا فيني ابقى شوفك عطول
عفواً
اي شبكي استغربتي بدي شوفك كل يوم
ليش
هيك
جد ليش
والله هيك
ما بظن فيني
بجي لعندك ع البيت
شووووو عفواً شو تجي لعندي ع البيت بصفتك شووووو
اي خلص روئي ههههههههه
ابتسمت بخجل وحطت راسا بالارض
دخيل الخجول انا اي
............................................
مر شهرين ع حكاية وليد وعالية واتعرف ع وضعا ووالدتا وصاروا يلتقو عطول بس تكون والدتا معون دايماً
وليد اكبر من عالية بـ 15سنة يعني وقت التقو هي كان عمرا 19 سنة وهو 35 سنة بس ما كان مبين عليه ابدا هالعمر كان مبين انو بالـ 25 بالكتير لانؤ مشبشب حالو ومظبط هندامو وشعرو ودقنو يعني كلو عالمؤضة...
بس ام عالية ما كانت مبسوطة من هي العلاقة ابداً وصارحت بنتا بهالشي وطلبت منا تتركو بس عالية ما وافقت لانها شافت انو مافي سبب لرفض امها لوليد...
المهم مرت ايام وزاد شهر ع عالوضع وبيوم وهنن قاعدين وليد طلب ايد عالية هيك فجأة وقدام امها عالية استحت وانصدمت وفرحت بنفس الوقت بس امها كتييييييييرررررر ادايقت وما نبسطت وقالتلو بكير ع هالحكي لسى..
بس راحو عالية وامها عالبيت اتعاتبو وعليت صواتن وعالية مصممة ع رأيا انو بدا وليد وخلص وجبرت امها يا اما بتوافق يا اما بتروح معو خطيفة وبلا علما..
انصدمت ام عالية وانقهرت وبكيت كتييييييييرررررر ... بس اخر شي قررت انها تجاري بنتها وتمشي معها مشان ما تخسرها....
حددو موعد تلبيس المحابس وعملوها بمطعم رفقاتو ورفقاتا وامها وبس
