الارشيف / قصص من الواقع

قصة عالية - المرحلة الخامسة ((4))

بيمرق شهرين ع قصة وليد وجيتو ع بيت عالية وسرق منها اسوارتين
عالية بتقدم امتحان البكالوريا وبتنجح بعلامات منيحة
ام عالية رجعت تتعالج عند دكتور من طرف كريم موصيه فيها والعلاج عم يبعتلا ياه من فرنسا بتتحسن شوي وبترجع بتنتكس شوي بس ع نجاح عالية انبسطت وطار عقلا وحست حالا مالكة الدنيا وعملتلا حفلة نجاح اضرب واطرح وعزمت حنان ورفقات عالية بالمعهد وجيرانا وطبعاً ام كريم واختو
وكلون جابولا هدايا وكان الجو كتير حلو وعالية كانت كتير مبسوطة ورايقة
كريم بيتصل بعالية بنص الحفلة وبيباركلا وبيطلب منها تفتح الباب
بتفتح الباب وبتلاقي دبدوب فرو كبير بطول الباب واحد شب حاملو من ورا وبيناولا كرت وبيعطيا الدبدوب
بتفتح الكرت وكريم بعدو معها عالخط
وبيقرالا المكتوب فيه بصوتو ((نشالله الف مبروك نجاحك يا عمري))
بتنبسط وبتتشكرو انو كانت مفاجئة حلوة كتير
كنت بتمنى كون معك هلأ 
مو مشكلة بعرف انك مشغول بسيطة راح الكتير ما بقي الا القليل
اصلاً عم عد الأيام بفارغ الصبر
عالية بتفوت ع اوضتا وبتكمل حديثا مع كريم ع الموبايل
معظم الناس راحو وضلت حماتا وبنت حماها لعالية وحنان
ام كريم وام عالية عم ياكلو كاتو ويحكو
بتعرفي ام عالية والله برافو عليها هل عالية ماشالله حولا قعدت بمعهد ودرست ونجحت بعلامات ما احلاها الله يرضى عليها اي هيك هلأ فيني قول عنها كنتي الفهمانة و ارفع راسي فيا
ام عالية بيرتفع ضغطا... شلون يعني ست ام كريم ما فهمت عليكي شلون هلأ فيكي تقولي عنها كنتك الفهمانة ليش بالاول شو كانت مو كنتك ولا كنتك يلي بلا فهم
لك لااااا الله يهديكي ما هيك قصدي يا ام عالية
لكن شو قصدك عيني واضحة مابدا اتنين يحكو فيا انو بنتي هلأ صارت من مستوا ابنك الدكتور
اي بس مو هيك قلت انا
اي شلبنتيا بس هيك القصد
ام كريم بتكمل الكاتو وهي لافة رجل ع رجل وعم تاكل بالشوكة من طرفا متل القرفانين 
ام عالية مسموم بدنها منها بس بتمرقا كرمال ما تعمل مشكلة وبتقوم بتعطي قطعة كاتو تانية لنورا اخت كريم وحنان
نورا... يسلمون خالة والله حاجتي هلأ اكلت قطعة بكفي هيك 
لا تؤبريني كلي ما بصير
بتاخد الصحن من ايد ام عالية... يسلمون
اتفضلي بنتي... بتعطي حنان
يسلمون يارب بس والله لسى ما خلصت يلي بصحني
معلشي كليها كرمال عالية
بتمضى الحفلة وكل مين بروح ع بيتو
عالية وامها بعد ما ودعو بيت حماها عم يلمو الصحون ويزبطو الطاولة
لك تضربلك هيك حماية شو مئنزعة أي
ليش ماما خير شو صار
طبعاً حضرتك قاعدة بأوضتك وعم تطقي حنك مع حبيب القلب ومالك دريانة بحكي حماتك يلي بيهز البدن
يعني هلأ بعد ما بلشت حبو وحب اهلو من تصرفاتو الحلوة والراقية وكلامو الرومانسي صرتي بدك تكرهيني فيه وفين مالك عرفانة كيف
لك بنتي مين الك بدي كرهك فين لك بالعكس انا كعيت فيكي لتحبيه وتعامليه منيح وتبطلي جفاصة معو بس انا عم بحكي عن حماتك هل ام اربعة واربعين مشان تديري بالك منها
ليش ماما شو ساوتلك يعني اول مرة بتشتكي منها وبتحكي هيك عنها
قال شو الخانم هلأ صرتي كنتا الفهمانة.. لك يعدمني ياها على هل الكلمة شو بايخة وقليلة ذوق
خلص ماما ما بتهمني المهم كريم يلي هو جوزي ورح عيش معو العمر كلو 
بس هي امو يعني الا ما تأثر عليه بكلمة او تصرف بايخ يتصرفو معك
ماما يعني شو ساوي اطلق منو واقعد بوشك مرة تانية
لك شو هالحكي هاد بعيد الشر.... لك عم الك ديري بالك منها وخليكي قد حالك وبس والله يحميكي ويعمي عنك ويسعدك انتي وزوجك الشهادة لله مافي منو مو متل هداك الواطي لك شتان شتااااااااان... بتحمل حالا وبتفوت ع المطبخ وعالية بتصفن بهداك الواطي يعني وليد وبتتذكر يلي ساواه فيها اخر مرة وقتا امها سألتا عن الاسوارتين الناقصين لانو امها كتير دقيقة بهيك شغلات وقتا هي قالتلا انو ضيعتون بحمام المعهد فاتت لتغسل وتتوضا وشلحتون وحطتون ع المغاسل وطلعت ولما رجعت ماعاد لقتن وع اساس اشتكت لادارة المعهد وطبعاً راحت القصة وامها نسيت الموضوع لانو اصلاً هي مخلوقة كتير بتنسا... بس ما قالتلا الحقيقة انو وليد اجا وسرقون وهددا وانو هي راحت تاني يوم ع المخفر واشتكت عليه بالاسم انو هو فايت ع بيتن بغيابن وسارق صيغتا كلا ما قالت اسوارتين بس والصيغة كانت بتسوا شي 500 الف بهداك الوقت فا هي ذكرت قيمتها وكل قطعة فيها للضابط الموجود بالقسم وهو سجل كل شي قالتلو بحذافيرو مع ذكر المفقودات كلن قطعة قطعة وطبعاً قالت انو ما كانت موجودة انو هنن كانو عند بيت حماها يوميتا
ولما سألها شو عرفك انو هو
قالتلو لانو هددني قبل بمرة انو يا بتنازل عن المتقدم والمتأخر يا اما بياخد صيغتي كلا وبرضايي يا اما بالتهديد او سرقة بدون علمي وهادا يلي صار
وقالها طيب نشالله منلاقيه فوراً وبس نجيبو منبعتلك تجي لتتعرفي عليه وع المسروقات هادا اذا ضلو معو
اي نشالله
ومضت القصة ومطت طبعاً وراحت واجت لوقت ما نجحت عالية بالبكالوريا وامها عملت الحفلة يعني شهرين
من وقت الحادثة
المهم بيجيها خبر من المخفر انو جابوه ولازم تجي تتعرف عليه
عالية بتكون مخبية صيغتا كلا عند رفيقتا حنان ولما سألتا ليش قالتلا بعدين بحكيلك بس هلأ خلين معك وخبين منيح ولا تخلي جنس مخلوق يعرف انو عندك الله يخليكي
تكرمي حبيبتي خير يارب
نشالله خير تؤبشيني شكراً حنون
طبعاً هل شي كلو بدون علم امها لانو خافت عليها لو عرفت انو هل واطي فات بغيابا ع البيت وقت كانت بنتا لحالا اي والله بتموت بأرضا
بعد ما اجاها التبليغ راحت ع المخفر وفعلاً لقت وليد مكلبش وقاعد متل الكلب ميت من رعبتو بتفوت هي بكل ثقة ورافعة راسا دغري الضابط بيسألا اذا هادا هو بتقلو اي هو بصير العسكري يلي ماسكو بيضربو طيارات والضابط يقلو وين الدهبات ولاه
وهو مرعوب ورح يعملا تحتو وعم ينكر ويقول لك اي دهبات هدول
بيضربو طيارة... ولك خراس ولاك كذاب وين خبيتون يلا قررر اعترف والا بتقضي عمرك بالحبوس هاه
عالية بتبتسم مبسوطة من كلمة الضابط انو يقضي عمرو بالحبوس
بعد ما يضلو عم يضربوه طيارة رايحة وطيارة جاية بيعترف انو اخد اسوارتين بس وطبعاً الضابط ما صدقو وضل يضربو ويبهدل فيه شي ساعة وكمان ما اعترف ويحلف انو ما اخد غير اسوارتين
عالية بتضل مصِّرة على شكواها انو الصيغة كلا 
الضابط بيأمر بحبسو لبين ما يعيدو التحقيق معو بكرة
عالية بتتشكر الضابط وبتستفسر منو وين لقوه لانو هو ماعاد في الو محل اقامة لانو اختو باعت البيت من فترة وتركت البلد.. بيقلا لقيناه ع حدود لبنان هيئتو كان هربان لانو لقينا معو مبلغ منيح يبدو انو كان بايع صيغتك
بكرة اذا ما عترف رح حولو للنيابة او بيدفعلك حق الصيغة وبتتنازلي ولا شو بتحبي
لا ما بتنازل وبدي يدفعلي حق صيغتي طبعاً 
طيب يعني بقصد ما بتحليها ودية قبل ما يتحول على النيابة
لا ما بحلا وكمان بدي حضرتك توقعو على اقرار بعدم التعرض لي لانو عم يزعجني ويقطع طريقي كتير ويهددني وبسببو كنت رح اخسر امي بيوم من الأيام بعيي الشر عن قلبها
سلامتها نشالله انسة خلص بكرة بتمرقي لعنا العصريات بكون قعد منيح بالحبس ساعتا منشوف شو الله بيخلق يا بيدفعلك يا بينحبس
اي ينحبس
يعني مابدك يدفع؟
هو ياريت يدفع وينحبس سوا
هههه حقودة كأنك
عالية بتدايق من سآلتو.... عفواً 
لا عادي عم بمزح
هادا الزلمة دمرني ودمر حياتي ومستقبلي ودمر علاقتي بماما وحتى علاقتي بنفسي دمرها وشوه احاسيسي ومشاعري وخلاني ما اقدر اوثق بمخلوق ع وش الأرض ولا حس بالحب مرة تانية خلاني خايفة من كلمة بحبك وما بدي اسمعا
الضابط اتأثر بحكي عالية كتير
نشالله بتنتقمي منو وبتخليه يتختخ بالحبوس لان فعلاً مبين عليه ابن حرام وانا خرج اتسلا عليه هالفترة لانو الصراحة مالل ودايق خلقي هاهاها
بتحاكي حالا.... شو غليظ الله ياخدك انت التاني
عفواً التي شي
لا ابداً عم يقول الله يعطيك العافية بتسمحلي امشي
اتفضلي ونشالله بكرة منلتقي
نشالله 
بتطلع من المخفر وهي عم تحاكي حالا... نشالله اعدمك انت وياه بيوو واحد
.........................
بيرن تلفون عالية منلاقيا بتطالع تلفون جديد يبدو هادا يلي جبلا ياه كريم واخيراً قبلت تستخدمو لانها ع الأكيد بلشت تشعر بناحيتو بشي اما بالاول لا لهيك ما كانت عم ترضى تفتحو
بترد عالية
اي ماما
هلأ طلعت وجاية ع البيت
اي لا مبلا قعدنا انا وحنان شوي بش اجا خطيبا وما حبيت طول
ماشي ماما اي يلا ربع ساعة وبكون عندك اوكي باي حبيبتي
بتتصل بحنان فوراً 
اي حنان ليكي انا كنت عندك ع اساس هاه
اي هلأ طلعت من المخفر
اي ههههه لا تمام ع كيفك
اي اسمعي يا ستي
عالية بتركب سيارتا يلي جبلا ياها كريم وبتمشي وهي عم تحكي مع حنان
................
طبعاً مافي داعي نذكر تفاصيل انو شو صار بالمخفر تاني يوم والحوار يلي دار بش المهم انو وليد باس ايد عالية وتذللا كتير لحتى تسقط حقها وتتنازل عن شكواها وما بتتخيلو هي شو كانت عم تتلذذ بذلو بس بالاخير وافقت تتنازل بعد ما دفعلا متقدما ومتأخرا وحق الصيغة كلا ووقع تعهد بعدم التعرض لها ابداً وطبعاً هو رغم هيك انحبس لانو في حق القضاء انحكم سنة وهي انبسطت كتير وعاشت حياتا بدون خوف منو واستنت يوم عرسا بفارغ الصبر
حبت كريم واخيراً وصارت تتصرف معو ع راحتا مو متل الاول يعني صارت تعاملو على انو زوجها
واجا يوم عرسها والتحضيرات ضلت اكتر من اسبوع هي وكريم وامها وام كريم كل يوم بالسوق وما خلا شي ما جبلا ياه وراحو ه الاوتيل وحجزوا القاعة سوا واختاروا الضيافة والأغاني وكل شي اختارو صالة مفتوحة وع المسبح بما انو الجو حلو والدنيا صيف
بيجي يوم العرس
عالية بتلبس بالسويت الخاص فيها بالاوتيل يلي رح يصير فيه العرس وامها معها عم تربطلا الفستان وبتجي تبع الميك اب وبتعملا مكياج وتبع الشعر كمان بتطلع بتجنن متل الباربي والابتسامة المرسومة ع وجها زادتها حلا
بيجي كريم لياخدا ع الزفة بيطير عقلو فيا كتييييييييرررررر وبصير يتغزل فيا وهي مافي غير تبتسم مبسوطة وامها عم تتأملها وطاير عقلا فيا
بينزلو ع الصالة وبيفوتو ع موسيقى هادية واكابرية وع سجاد احمر والعالم عم تراقبون ويلي عم يتحسر ويلي عم يحسد ويلي ويلي
وهي ماشية ومو هاممها شي مشنكلة جوزا وماشية هي وياه بيوصلو وبقعدو ع الاسكي المكسي بالورد من كل الأنواع 
بيحطو غنية سلو خاصة للعرسان يرقصو عليها
بيقومو وبيرقصو وهو بيحضنا وبيلف ايدو ع خصرا وبيحط عيونو بعيونا وبيرقصو كانو لحالن ومافي حدا حواليهن بيغيبو مع الغنية وبيتأملو بعض
بتخلص الرقصة وبيرجعو للاسكي وبعدين بتبلش العالم ترقص وبيمضى العرس على ما يرام وطبعاً لبسوها دهب اكتر من الخطبة
بيخلص العرس تلاتة الصبح وبيروحو ع السويت يلي حاجزو كريم مشان هي الليلة
والعالم بيروحو ع بيوتون وام عالية وام كريم ضلو بنفس الاوتيل لانو كريم حاجز لكل مين فين غرفة لحالا مشان يفطرو معون الصبح ويودعون لانو طالعين ع المطار فوراً مسافرين ع فرنسا
..........................
يتبع

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

قد تقرأ أيضا