أعربت الفنانة منى زكي عن سعادتها بحصولها على أفضل ممثلة في مهرجان "السينما العربية ACA"، بالإضافة إلى سعادتها بردود فعل الجمهور.

وأضافت زكي خلال مكالمة هاتفية في برنامج "راديو سكوب" الذى يذاع على الراديو 9090 قائلة: "أنا معرفش ليه حصل الانفجار ده على رد فعل أحمد حلمي تجاهي، ولكن الطبيعي إن هو جوزي وهو يفرحني وأنا كنت فرحانة بزيادة وأحمد جوزي وبيساندنى".

وأضافت: "ممكن الناس بقالها كتير في ظروف مش لطيفة، وشوية أحداث مش لطيفة الناس بقالها كتير مشافوش حد ممكن يكون انبسط أو حد بيظهر امتنانه وحبه يمكن ده حصل وأنا شايفاها حاجة عادية مش غريبة، وشرف لينا أكيد احنا مبسوطين بحب الجمهور لينا وبنقدره وبنحترمه".

وعن أبرز ردود الأفعال ردت قائلة: "أنا انبسطت من كلام بنوتة كانت كاتبة منى زكي مش أحسن منك واتكلمت عن الراجل اللى المفروض يكون سند وشايفاها حقيقة البنت المفروض تتجوز عشان حبت شخص لإن هو ده الشخص الحقيقي، كل حاجة بتروح بعد مدة إنما العشرة الحلوة هي اللى بتفضل عشرته حلوة، معناها إن في ثقة واحترام وحوار متبادل وحاجات كتير".