ولدتيني يا يما وعلمتني نقول الحق ولو في حبابي
ربتيني وعلمتني كيف نتعامل مع الناس وصحابي
قريتيني ووريتيني كيف نكون محب لديني وطني وما نكون لا مجرم ولا إرهابي
قريت وكافحت يا يما وحلمت نكون غير أستاذ
لكن كاين لي مادار والو حيت باباه فلان وطلعوه على حسابي
واش يرضيك يا يما أولادك يسيل دمهم حيت طالبين حقهم هادي سنين
واش يرضيك يا يما بناتك قلبهم يتقطع ودمعتهم تتعصر من العين
واش يرضيك يا يما يخاليونا مقهورين نكمدو جراحنا بحزن وأنين
وكلنا عارفين شكون لي خيبنا ومرغ جبيننا في الوحل والطين
عارفين شكون لي مدارو والو زين
كيعرفو يزيدو غير في الماء والضوء والزيت والغاز والسكر والطحين
لي عاندهم غير مع الدرويش والمسكين
مدوزيين لافير مع بعضهم وعايشين
طبعاً منقدوش على دوك المفلسين
راكم عياقتيو يا بن ادم باركا علينا من الكدوب وباراكا من اللعب والكوميديا وبراكا من قلة الدين
ابن ادم ..ابن ادم ..ما خليتو حتى شي حاجة في هاد البلاد زين
باركا علينا من الوعود الخاوية وباركا الشعارات وباركا من العجين
كتعرفو تنضمو غير طنجاز وتويزا وموازين يا قلالين الدين
البرلماني يتخلص وخا يقايل ناعس وكتفكرو تسوفو دم المسكين
البرلمان رجاع برنامج كوميديا ناقصو غير جاواج وباسو ومميح وجمال ونور الدين
يا يما ولادك قراو وتعلمو وعادونا باش نخدمو وخلاونا مهمشين
بالجوع والسمر خالينا راسنا ناقصين
اوا هاحنا وصلنا لهدفنا واش ما بغيتوشي تشوفونا واصلين
ما بغيناشي شي حاجة مستحيلة بغينا غير نكونو في عملنا مستقرين
أولادكم كتقريوهم في أحسن المدارس في أوروبا وأمريكا وحتى في الصين
واحنا بغيتو ولادنا يبقاو ديما مكلخين
الميساج راه واضح لي فهم راه فاهم ولي مفهامشي غير يدفن راسو مع الميتين..؟؟
المجلة غير مسؤولة عن الآراء و الاتجاهات الواردة في المقالات المنشورة
