حوار خاص مع الخبير التسويقي د. أحمد شريف
في ظل الانتشار الكبير لمواقع التواصل الاجتماعي، أصبح الأطباء يتجهون بقوة نحو الظهور الرقمي، لكن البعض يتساءل: هل هناك ضوابط يجب أن يلتزم بها الطبيب عند استخدامه للسوشيال ميديا؟
يجيبنا د. أحمد شريف، الخبير التسويقي ورائد الأعمال، بأنه:
"بالتأكيد، الظهور الرقمي أصبح ضرورة، لكن إذا لم يُدار بشكل مهني وأخلاقي، ممكن يكون ضار جداً لصورة الطبيب.
الطبيب لا يسوّق منتجاً، بل يسوّق ثقة، وبالتالي لابد أن يحرص على أن يكون كل ما ينشره على السوشيال ميديا يعكس مهنية حقيقية واحترام للمريض والمهنة في نفس الوقت."
* أهلاً وسهلاً بيك يا دكتور، في البداية ممكن تعرفنا بحضرتك؟
أنا د. أحمد شريف:
حاصل على الدكتوراه الفخرية في التسويق وإدارة الأعمال من لانكستر أكاديمي – المملكة المتحدة
• حاصل على ماجستير إدارة الأعمال من كلية التجارة – جامعة القاهرة
• حاصل على دبلوم إدارة الأعمال من كلية التجارة – جامعة القاهرة
• المدير التنفيذي لشركة Alpha Centauri للتسويق وتنظيم المؤتمرات الطبية
• المؤسس المشارك للجمعية الدولية للتجميل وطب النساء (IAAUG)
* ولكن ما هي أبرز الأخطاء اللي حضرتك بتشوف إن بعض الأطباء بيقعوا فيها على السوشيال ميديا؟
أضاف د. أحمد شريف، الخبير التسويقي ورائد الأعمال، بأن هناك أخطاء شائعة جداً، منها مثلاً:
• نشر صور قبل وبعد بدون موافقة واضحة ومكتوبة من المريض
• استخدام لغة ترويجية أو مبالغات فيها وعود بنتائج مثالية
• الاعتماد على محتوى "تريندي" بشكل سطحي لا يعكس قيمة علمية حقيقية
• أو الأسوأ: الظهور بشكل لا يليق بصورة الطبيب، سواء في اللبس أو طريقة الكلام
* طب إيه هي النصائح اللي ممكن حضرتك تقدمها لأي دكتور عايز يظهر على السوشيال ميديا بشكل احترافي وآمن؟
فأجاب د. أحمد شريف، الخبير التسويقي ورائد الأعمال، أنصحه بالآتي:
- خلي المحتوى تعليمي وتوعوي قبل ما يكون ترويجي
- هدفك إن المريض يثق في علمك، مش ينبهر بمظهرك
- اتكلم بلغة الناس، بس من غير ما تفرّط في الهيبة العلمية
- البساطة لا تعني السطحية
- حافظ على خصوصية المريض مهما كان، حتى الصور لازم تكون بموافقة واضحة وتُقدَّم بشكل يحترم الحالة الإنسانية
- خلي صورتك دائماً احترافية، سواء في الصور أو الفيديوهات أو حتى طريقة الرد على التعليقات
- خلي دائماً معلوماتك الأكاديمية موجودة وواضحة، دي بتدي مصداقية عالية لأي متابع جديد
* بعض الأطباء بيحسوا إنهم لازم يعملوا محتوى "خفيف" عشان يمشوا مع التيار. هل حضرتك مع ده؟
فأجاب د. أحمد شريف، الخبير التسويقي ورائد الأعمال، بأن:
"المحتوى الخفيف مش عيب، لكن لازم يكون متوازن. الطبيب مش مؤثر، هو قدوة.
محتواه لازم يكون ممتع، لكن بدون تفريط.
ممكن توصل المعلومة الطبية بأسلوب بسيط أو ساخر، بس ما ينفعش تتنازل عن احترام قيمة المهنة."
* هل تنصح الأطباء إنهم يديروا حساباتهم بنفسهم، ولا يستعينوا بمتخصصين؟
فأفاد د. أحمد شريف، الخبير التسويقي ورائد الأعمال:
"المهم مش مين اللي بيدير، المهم إزاي بيدير.
لو هيستعين بمتخصص لازم يكون فاهم المجال الطبي، مش مجرد مسوّق عام.
الطبيب كمان لازم يكون دائماً مطّلع ومشارك في كل خطوة.
السوشيال ميديا مش مكان للتفويض الكامل، لأن كل كلمة وصورة عليها ممكن تبني أو تهدم سنين من السمعة."
* ممكن كلمة أخيرة تحب توجّهها للأطباء المهتمين ببناء حضور رقمي احترافي؟
"الناس ما بقيتش تختار الدكتور من اللوحة اللي على العيادة، بقت تختاره من الشاشة.
خلي كل حاجة بتظهر بيها تعبر عنك كطبيب محترف.
مش كل تريند ينفع ليك، ومش كل فكرة تسويقية تناسب مهنتك.
اشتغل على بناء الثقة قبل عدد المتابعين."
المجلة غير مسؤولة عن الآراء و الاتجاهات الواردة في المقالات المنشورة
