حياتك طبخة .. آه .. طبخة .. هاتظبط لو حطيت فيها نَفَسك بكل اللي فيه من حب وحماس وإبداع، وهاتاكلها وتتبسط وتستمتع انت واللي معاك.. وهاتخيب وتدّلق لو طبختها بمزاج متعكر، ونفس مش راضية، ودماغ مشغوله بهموم مالهاش حصر.. وساعتها هاتخسر كتير.
دي ببساطة الحكمة اللي طلعت بيها بعد 3 شهور ونص جواز.. قضيت نصهم تقريبا أو أكتر شوية في المطبخ.. بين الحلل والأطباق والخضار واللحمة والتوابل والرز والسمن والزيت.. كل تفصيلة في المطبخ من أول البوتجاز لحد علبة الملح، لقيت فيها شبه من الحياة اللي بنعيشها والبشر اللي بنعاشرهم، وكل حاجه بنعملها جوة المساحة الضيقة دي والمليانه بالتفاصيل بتشبه حاجات كتير في الحياة ..
وخد عندك يا سيدي..
فيه ناس في حياتك زي أنبوبة البوتجاز .. لو فضيت منك فجأة هاتضرب لخمة وتتلخبط كل حسابتك، وفيه ناس بتحضنك زي الحلل وتسترك زي غطاها، وتداري على اللي جواك وتحمي أسرارك وتستوعبك مهما كان طعمك.
فيه ناس زي الأطباق والكوبايات.. استيعابها محدود، ولو أديتها أكتر من اللازم هاتعك حياتك. وفيه ناس ممكن يدوا حياتك طعم زي السكر والملح والتوابل .. بس برضة ممكن في لحظة يبقوا خطر وتضطر تبعد عنهم بأمر الدكتور.
فيه ناس في حياتك زيت والسمن وجودهم لازم عشان الطبخة ما تتحرقش، بس كترهم وحش ومضر بالصحة.
في ناس تلاقيهم زي سلة الزبالة بالظبط لازم يبقوا في حياتك عشان ترمي جواهم كل حاجة مالهاش لازمة وتعيش بنظافة.. بس لازم من وقت للتاني تساعدهم في التخلص من زبالتك اللي رمتها فيهم عشان يفضلوا مكملين ومستوعبين مشاكلك..
فيه ناس في حياتك زي البصل ممكن يبكوا عنيك .. بس مفيدين جدا ووجودهم ضروري وصحي عشان طبختك يبقى ليها طعم.
وفيه ناس بتتفرض عليك وتعمل زحمة في حياتك غصب عنك، زي طقم الصيني وشنطة المعالق اللي مالهاش أي لازمة.
في ناس بتنبهر بيهم وتدفع عشانهم كتير من دمك وأعصابك وبعدين تكتشف إن مالهمش أي لازمة في حياتك، بالعكس بيبقوا عبء عليك وشاغلين مساحة من دنيتك من غير أي فايدة، زي أطقم الكاسات الكريستال اللى ايدك ما بتدمش ليهم أبدا ولا بيجوا على بالك من الأساس وخصوصا لو كنت مش غاوي منظرة زي حالاتي.
الحياة مطبخ بكل اللي فيها من دوشه وزحمة وتفاصيل .. الحياة ماليانه بحاجات حلوة وحاجات خطر، ماليانه بحاجات طعمة، وحاجات مزة، وحاجات حادقة ومرة ومسكرة.. انت لوحدك اللي تقدر تعمل من كل الحاجات دي طبخة مميزة تشبه روحك وتحمل بصمتك..وتفضل لوحدك عارف سر الخلطة اللى بيها تفضل مكمل وقادر تعيش.
تقدر بأقل التكاليف وعلى أد الايد زي مابيقولوا تعمل طبخة حلوة تبسط بيها اللي حواليك.. وبنفس المنطق تقدر برضه بأقل التكاليف وعلى أد الأيد تعيش أوقات سعيدة تستمع بيها انت واللىي معاك ..
اطبخ بمزاج حتى لو بتطبخ شوية عدس، يعنى اتعلم تستمتع بوقتك .. وباللى بتعمله.. اتعلم تعيش الحياة بسعادة مهما كانت ظروفك.. ماتخليش الحياة هي اللي تعيشك وتفرض عليك ظروفها.. مهما كان وضعك وظروفك وفي كام في جيبك .. تقدر تسعد نفسك وتسعد اللي حواليك .. الموضوع كله نية وشوية تفكير بأيجابية .. لا تؤجل متعة اليوم للغد.. ولا تؤجل طبخة اليوم للغد برضة ..
ونصيحة أخيرة ..اعمل كل حاجة في حياتك بمزاج.. واطبخ بمزاج.. .. اوع تعمل أكله وانت مزاجك مش حلو.. لانها هاتطلع وحشة وتعكس روحك.. وانت بتطبخ فكر في كل الحاجات الحلوة اللي عشتيها، واحلم بحاجات احلى .. هاتلاقي اكلك بيعكس روحك واحلامك..
لو متخانق مع حد ولا مزاجك وحش كل اى اي حاجة بس بلاش تدخل المطبخ وتطبخ لانك هاتخسر والميزانية هاتخرم لما ترمي الطبخة فى الزبالة... عيش حياتك بنفس المنطق.. هاتفرق كتير.