في غير ذات موضع، قرأت طيّاري كده بتميك فَن أوف إن الست لما بتتجوز -بعد ما كانت قبله بتدرس وتشتغل وتخرج وتتفسح وتهيص وبتاع- فجأة بقت بتطلع الفراخ تفك م الفريزر وتهتم بشرابات زوجها وبتاع.. فكانت الفراخ المجمدة والشرابات هي الـsymbols المرحلة يعني تعبيراً على مدى قماءة الزواج والكومتمنت المرجوّ من ورائه.
وحيث إنهم strong independent women، فهم متنزّهين عن كل الشرابات دي طبعاً، وينأوا بأنفسهن عن كل هذه البوهيميات، وحيث إني كنت يوماً معتنقة للأفكار السنونو دي، ومدافعة شرسة عنها، خليني بس أشرح وجهة نظر ما.
تأسيسياً كده:
- في أي مبادئ لأي علم اجتماع في الكوكب، إنه للإناث أدوار اجتماعية مُتّفق عليها بناءً على العرف والدين السائد وكذلك الذكور، بتختلف من أرض لأخرى، ولكن بعموم الأمر: قد فُطر الرجال بالطبيعة والسليقة على أمور ومهام وأنماط مُسلّم بيها، وكذلك النساء.
الخلط بين المهام إنه الرجل يقوم بدور النساء أو العكس: بيبقى من باب سد الثغرات والطوارئ والظروف الاستثنائية.
يعني إحنا كنساء جُبلنا على حب الزينة، فبيبقى من المنفّر جداً إننا نلاقي راجل حاطط روجاجو أو lipstick أو بيتصور أو يتكلم أو يضحك زيهم أو يتواجد في مجالسهم بوفرة.. ليه؟ لأن دي مش من أعمال ما تُعورِف عليه من أعمال الرجال. (بالفطرة والإجماع).
وكذلك النساء، بيكون من المنفّر بالنسبة للرجال إنه يلاقيها صدّاحة رنّانة فاحشة اللسان مسترجلة ماشية نافخة إيديها وباعدة بين رِجليها وبتخشن صوتها زيهم.. ليه؟ لأن دي مش من سمات الأنوثة مما اتُّفِق عليه (بالفطرة والإجماع).
- الزواج يُقام على حجرين، الرجل: السيطرة على الأمور، الاحتواء، إعالة الأهل، المعونة وغيره.
السيّدة: الحكمة، حسن التدبير، الاحتواء، التربية، الإهتمام والعناية وغيرها.
بيصل بينهم: لست وحدي (كقاعدة)، الاحترام (ثلاثاً)، التغافل، التبادل، الاحتواء، البذل، الصبر، الودّ، التراحم وغيرها.
ما ينفعش ولا يصح ولا يجوز بأي حال من الأحوال إنه حجر يتخلّى عن أولوياته ومهامه الأساسية لمجرد إنه عاجبه attitude بيمنحه إحدى مهام الطرف التاني أو أي شخص أو منصب بالمطلق، فيروح فالت إيده خالص ورايح شابط في حاجة ليست بذات الأهمية والأولوية في قائمة نجاح العلاقة واستقرار البيت، ويقول دي ذاتي وكياني.. ضارباً بعرض الحائط مقتضيات الشريعة أو العرف الاجتماعي وكل ما يُعتمد عليه في إنجاح الكينونة ككل.
طيب تأسيسياً تاني لكن على الهامش هذه المرة: يعني إيه تحقيق ذات + هل هي مترادفة للسعادة والاستقرار؟ الترقّي في المناصب؟ الدكتوراه؟ الفلوس الأكتر؟ السفر؟
طيب بالمناسبة، دي كانت tedx-talk عن تجربة اتعملت على مدى 60 - 70 سنة بخصوص (ما الذي يُحقق الحياة الطيبة؟)، حديث ماتع جداً ومترجم، ممكن تشوفوه هنا:
الخلاصة: الحياة السعيدة هي اللي كان الأسرة فيها والعلاقات الطيبة في المقامات الأولى، واللي كان أصحابها حاسيين بدفء حميمي مع أفراد أسرتهم وعائلاتهم وأصدقائهم.
- عودة لنقطتنا، من المهم جداً إنه المرء يختار أولوياته وأهم القيم والغرائز اللي بتحرّكه وبتتحكّم في تشكيل معنى لحياته + هيرتبها إزاي.
يعني لو بالنسبة لك احساس الأمان والدفء والاحتواء والأمومة، فالزواج الهادئ الناجح هو مصدر كويس ليكِ.. فده هيدفعك دفعاً لاختيار شريك مناسب + السعي بجدية على طول الخط لإنجاح الأمر واتيفر إت تيكس + مش هتعبئي بالقيم الأخرى الأقل أهمية في نظرك من قيم الزواج.
لو الإنجاز والطموح و(تحقيق الذات، واتيفر إت ميينز يعني) والترقية مهمة ليكِ، فانطلقي بردو.
وممكن ده هيأثر على اختيارك لشريك حياتك إنه يبقى حد مثلاً متقبل لفكرة اختلاطك بالناس برّة بالحلو والوحش، وتقصيرك في البيت...
- بس أياً كان اختيارك، عليكِ أن تفرّقي بين اختيار نقيضين، أو إنك تختاريهم بنفس الحمية والدرجة، يعني عايزة تتجوزي عشان أمان وأمومة مثلاً وده حرج جداً بالنسبة لك، فهتضحي مثلاً إنك في مرحلة ما مش هتبقي الـbest employee مثلاً وانتي حامل أو مُرضعة أو واتيفر.. محدش بياخد كل حاجة يا مسعودي.
- ليه الكلام ده؟
عشان ما نخلقش وننتج مجتمع ممسوخ وشائه وفاقد للأهلية والمعنى، لو مش عايزة تطلعي الفرخة من الفريزر أو تدوري ع الشرابات، لأن انتي شايفة ده بيلغي كرامتك وبيحسسك بالفشل، فإتس أوكي.
لأن دي قيمك ومحفزاتك الشخصية وأولوياتك في مقابل مكاسب تانية بتجنيها عشان شايفة إنك strong independent .. بس ووتش آوت بقى إنك تسخري من ده، ليه؟ لأن دي بالفعل أمور بتعملها نساء أخرى بمنتهى الحب والرضا والسلام مقابل مكاسب تانية بتجنيها لأنها بردو شايفة إنها كدا strong independent.
فما تبقيش انتي بتلعبي دور السخّان اللي بيسخّن واحدة (يمكن ليست على القدر الكافي من التحصيل والعقلية النقدية إنها تحكم) على إنها تتمرد بلا هدف أو دليل على وضعها وحياتها لمجرد إنه هو ده التريند.
- وبعدين إيه strong independent دي؟ أنا عمري ما شفت مثلاً راجل (وأعني راجل) بيقول أنا مش محتاج ست أو حد في حياتي أنا مكتفي بنفسي أنا أحسن حد في دنيتي، أهم حاجة شغلي وأصحابي.. ده اللي بيبقى كده بنسميه عيّل ومصوصو كدا ومش متحمل للمسؤولية. ليه بنعمل ده في المقابل وبنعتبرها الـlife goal يعني؟ مسم..
* طبعاً ما بتكلمش عن الحالات الشاذة والأوضاع غير الصحية والزيجات اللي بالأساس قايمة على فساد وحمق من البداية.