قصة واقعية حدثت في مجتمعنا بالفعل، لكن مع بعض التحريف بالأسماء ومجرى الأحداث للمحافظة على خصوصية صاحب أو صاحبة القصة و بأسلوب كتابي سهل وبسيط وحياتي ... و الهدف من هذه القصة التوعية من جميع النواحي...

الجزء الثاني من قصة عالية

صفنت عالية وصارت الافكار تاخدا وتجيبا شروي غروي ما خلت شي ما فكرت فيه عيلتا ووضعا ومأساتا والوضع يلي هي فيه وكلام الناس عليها انو فلتانة بتروح من الصبح ما بترجع لنصاص الليالي وهي مسكينة بتكون عم تدور ع شغل او عم تشتغل شغلتين بالنهار تا تلحق ع مصروفا هي وامها والغريب انو صارت صورة الشب تروح وتجي ببالا مع هالافكار كلا وتسرح بخيالا مابتعرف لوين.. فجأة بيطلع صوت بيقطع عليها افكارها وصفنتا 
السكرتيرة: اتفضلي انسة عالية الاستاذ زهير بانتظارك... 
بتقوم عالية من ع الكرسي وبتلقي نظرة ع المكتب يلي كان فيه وليد بس ما بتلاقي فيه حدا الباب مسكر ومطفي الضو.. 
السكرتيرة: اتفضلي من هون 
وبتاخدا ع مكتب المدير 
السكرتيرة بتدق الباب وبتفتحلا وبتفوتا وبتسكر الباب... 

عالية: مرحبا

في مكتب وكرسي خلف المكتب بس مو مبين مين قاعد عليه لانو ضهرو لعند عالية وصوت بيظهر من هالكرسي: اتفضلي ارتاحي ثواني اهلا وسهلا
بتقرب عالية بخطوات بطيئة وفيها شيء من الخوف وبتقعد ع طرف الكنباية 
بيلف الكرسي وبيطلع يلي قاعد عليه ممثل من الدرجة العاشرة وحاطط اركيلة بتمو وعم يحط فحمة من المجمر يلي حاطو جمبو بالارض 
بابتسامة: اهلين يا حلوة كيفك 
شو اسمك عرفيني عن حالك 
عالية: اهلين فيك استاذ انا عالية عمري 19 سنة... 
ممممممممممممممم يا هلا يا عالية 
بتحبي الاركيلة؟ وبيشفط وبيطالع دخان من تمو وانفو 
عالية مستغربة: لا ما بأركل بس بدخن 
اوووووووو بتدخني لكان صاحبة مراق يا ضرسانة 
بينادي وبصوت عالي: نانسي يا نانسي 

بتفوت نانسي السكرتيرة: نعم استاذ امور
ساوي فنجانين قهوة 
عالية شو قهوتك حبيبتي 
شكراً شربت من شوي
لا ما بيصير اشربي واحد معي ودخني 
شكراً قهوتي سادة
نانسي اتنين سادة اوام وسكري الباب
حاضر استاذ 
وينك وينك نانسي 
ايوا استاذ 
وينو وليد
كان هون وسال عنك وبعدين فات ع مكتب النصوص قعد شوي وبعدين قال عندو شغلة ضرورية وبيرجعلك بتكون اجيت 
اوك ليكي بس يجي ابعتيلي ياه فوراً 
حاضر استاذ 
اي يا عالية ما التيلي شو عندك مهارات شو اشتغلتي قبل هيك 
انا اشتغلت كل شي ممكن البنت المحترمة تشتغلو 
متل شو؟
متل مجال بيع الالبسة بمحل ماركات عالمية ومحلات اقمشة معروفة بالصالحية والسكرتارية بشركات كبيرة طبعاً وعندي خبرة فين كلن.. 
ممممم برافو.. طيب وشو خلاكي تجي تقدمي ع شغلتنا نحنا ما بدنا سكرتارية ولا عنا مجال لبيع الالبسة ولا حتى اللانجوري ههههههههههههههههههههه يضحك باستهزاء... 
لا تدايقي عم بمزح بس قصدي هالشغلة بعيدة عن كل المجالات يلي اشتغلتي فيا مزبوط.. يعني شو يلي خلاكي تفكري تقدمي على شغلة مذيعة؟

استاذ انا ما عندي خبرة فيا صح بس بحب هيك شغلة ومن زمان بتمنى صير مذيعة او معدة برامج وحتى كاتبة قصص قصيرة وعندي تجارب بسيطة بكتابة القصص القصيرة وقت المدرسة. 
ايواااااا اي طيب مو مهم عنا الخبرة لانو رح نعلمكم بس المهم الجمال واللباقة كتير ضروريين بتعرفي... /وهو عم ينظرلا نظرات خبث من فوق لتحت/ وانتي ماشالله ما بينقصك شي من التنتين اسم الله حولك... 
شكراً بس ياريت نفوت بالتفاصيل مباشرةً لانو ماعندي وقت كتير 
اوك حبيبتي 
بيندق الباب وبتفوت السكرتيرة وهي عم تضحك وجايبة صينية القهوة وجاي وراها وليد 
وهي اجا حبيب قلبك استاذ 
نانسي بتحط القهوة ع الطربيزة يلي قدام عالية وبتروح ع مكتب زهير وبتحطلو فنجانو وبدا تمشي 
استني خدي هالصحن سيجارة وحطي عند الانسة عالية 
حاضر استاذ 
اتفضلي انسة عالية 
يسلمو 
بدك شي استاذ 
لا طلعي وسكري الباب 
تعا وليدو فوت شبك واقف ع الباب 
لا بس عم بستنا تفضالي وهو عم يطلع بعالية 
مرحبا انسة عالية 
شو بتعرفا؟!!! 
لا الصبح اتقابلنا هون بس ما سمحتلنا الفرصة انو نتعرف 
ايوااااااااا... اي عود بلا علاك
له ليش هيك عم تبهدلنا قدام الاكابر يا ابو الزوز
ابو الزوز بعينك تضرب بموديلك ولا معلمك انا
ههههههههههههههههههههه طيب ع راسي معلمي... بيطلع بعالية / عم يمزح عم يمزح لا تصدقيه
اي عالية ايمتى بدنا نبلش بالتيست تبع الكاميرا
عفواً بس ما حكينا بالتفاصيل
لك شو بدك انا جاهز 
يعني بس الراتب والدوام وهالقصص كتير مهمة عندي ياريت تتوضح من هلأ 
خلص ولا يهمك متل ما بدك بصير 
اووووووووو شو هالدعم المعلم عم يقلك متل ما بدك بصير لك والله لو صحت لستي ما ماتت ههههههههههههههههههههه 
عالية بتضحك ضحكة صفرا

يبدو انو عالية ما حبت الجو ابداً وما ارتاحت لهادا الزلمة يلي اسمو زهير.... 
طيب لو سمحت اذا مافي شي نحكي فيه ممكن امشي؟
وييييننن بكييييرر عدي لسى ماتغدينا وينك وليد طلاع جبلنا غدا... 
لا لا لا يسلمو كتير ماما ناطرتني بدنا نتغدا سوا... يلا بخاطركم وفرصة سعيدة.. 
لك وين طيب عطيني رقمك
خلص انا برجع بتصل سلام 
حملت حالا وطلعت مستعجلة 
صارت بالشارع وبعدت شوي عن مبنى الشركة واتنفست الصعداء 
وصارت تحكي مع حالا: اوووووووف لك شو هالوقعة يلي وقعت حالي فيا لعمى باينتو نصاب وقليل ادب.... 
صوت بيندهلا 
عالية عالية وقفي شوي دقيقة
التفتت ع الصوت واتفاجأت باللي عم يناديلا..... 
 

يتبع...