ام عالية بالعيادة عند اخوها يبدو انها حكتلو كلشي مشان موضوع بنتا عالية ووليد ويلي صاير كلو المهم اخوها بيقوم من ورا طاولة المكتب تبعو وبيلف ليجي يقعد بالكرسي يلي مقابيل ام عالية 
هو طويل وهيبة ولابس مانطو ابيض تبع الدكاترة وحاطط سماعة تبع دقات القلب حولين رقبتو ونهايتا بجيبة المانطو يعني متل ما بيعملو كل الدكاترة
بعد ما يقعد مقابيلا
اختي اسمحيلي الك انك غلطانة
لك شلون غلطـــ........
بيقاطعا.. خليني كمل حكيي
اتفضل اخي 
انتي غلطانة والغلط راكبك من ساسك لراسك 
تجي بدا تحكي 
ياريت ما تقاطعيني وتسمعي للآخير وبعدين بتحكي يلي بدك ياه اتفقنا 
يبدو انها يتعملو اعتبار وبتخاف منو او بمعنى اصح بتهابو وبتحترمو شنو هو الأخ الأكبر
بتهز براسا بالموافقة
طيب منرحع لحديثنا اختي اسلوبك معها من البداية غلط ع هوا ما حكيتيلي عم تشدي مرة وترخي مرة وبترفضيلا طلب وبعد شوي بس تشوفيا زعلت بتوافقي ع نفس الطلب يلي رفضتيه وهي مشكلة لانو بينتيلا انك شخصية مهزوزة قداما هادا واحد اما اتنين وهو الأهم بما انك مالك الشخص المثالي يعني انتي بالمشرمحي مالك انظم منها.... لك اي اي لا تبحلقي فيني هيك يعني نسيتي حالك بتحبي ذكرك ولا مافي داعي
بشو اخي بتقولا وهي مترددة وبتطلع بالارض خجلا
يا ستي انتي عملتي العمايل لتتجوزي ابوها لبنتك بتتذكري شو ساويتي بتتذكري شلون ما سمعتي كلمة حدا فينا اترجيناكي تعيدي نظر بالقصة لانو سألنا عنو وعرفنا قديشو سيئ ومقطع وموصل واخدك ع طمع بتتذكري قديش احترق قلب امك وماتت من قهرا لما عرفت انك رحتي معو خطيفة المسكينة ما تحملت حرقتي قلبا عليكي الله يرحما
ام عالية بتنزل دمعتا
وكلو باسم الحب صح ولا انا غلطان اختي؟!! اذا عم بحكي غلط صلحيلي
بغصة... مزبوط بس شو دخل عالموضوع بمشكلة بنتي هلأ 
شلون شو دخل دخل ونص
حبيبتي لما بدك بنتك ما تعمل شي غلط بدك تكوني مربيتيا ع الصح بدك تكوني مثل اعلى الها 

هلأ اخي انت بدك تقهرني اكتر ماني مقهورة
لك حبيبتي انا مابدي اقهرك وانتي بتعرفي اني واقف معك من وقتا مع انك كنتي غلطانة بس انا ما قدرت اتخلا عنك متل ما ساوت العيلة كلا... المهم هلأ يلي بدي الك ياه انو لا تمارسي ع بنتك الضغط واسلوب الأنا يعني يلي بدك ياه انتي هو يلي بيصير وبس بقصد انك ما تلغي شخصيتها اتركيا تاخد قراراتا بنفسا وتكون مسؤولة عنها كمان خليها تتعلم تكون شخص مسؤول مو اتكالية وجبانة لازم تكون شجاعة وتجابة وتواجه الكل وتدافع عن قراراتا ومعتقداتا 
يعني بدك ياني اتركا تتزوج هالحقير
اي اتركيا ووافقي وساعديا ووقفي جمبا بتعرفي ليش لأنها مصرة ع هوا ما حكيتيلي انا فهمت وبعدين انا بعرف عالية عنيدة وبعرف لمين طالعة كمان... بيطلع بأم عالية نظرة من فوق النظارة.... بقى نصيحتي الك خليها تعمل يلي بدها ياه بس ادامك وبرضاكي احسن ما تعملو غصبن عنك وبطريقة بشعة وتقهرك وتجبريا تبعد عنك وتصير وحيدة.. خليكي سندها مالا غيرك ما تنسي هالشي 
طيب انا كيف بدي خليا ترجع تثق فيني وتحكيلي كل شي بعد ما صار يلي صار يعني كيف رح تقتنع اني وافقت مع اني من كم ساعة ضربتا واهنتا قدام هالمغضوب لك اصلاً كلو منو الله يقصف عمرو اااااااااخ ياربي شو هالحالة ليش هيك عم يصير معي والله رح طق من قهري
بيشلح المانطو الاييض وبيلبس جاكيت رسمي فوق القميص والبنطلون يلي لابسون (مرتب الضرسان اكابري مبين دكتور ياعمي مافي كلام) 
قومي معي
لوين
لك قومي يلا مو بدك ترجع علاقتك ببنتك منيحة وتقوليلا انك موافقة بدون ما تطلع شخصيتك مهزوزة قداما 
اي اي والله
لكان تعي معي يلا
بيحملو حالون وبيطلعو من العيادة 
بيحكي مع السكرتيرة وهو عم يقفل باب عيادتو.... سكري العيادة وروحي انا مو راجع اليوم سلام
السكرتيرة.. طيب والمواعيد دكتور
وهو طالع لبرا صار ع باب العيادة الخارجي.... الغيون كلون
بيركب سيارتو وبتركب اختو جمبو 
سيارتو جيب شيروكي فضي 
بيمشو

----------------------------------------------------------

المرحلة الثانية الجزء ((5)) 2
عالية بعدا باوضتا عم تبكي وهي طابة ع تختا فجأة بتقوم بتسمح دموعا وبتتغير ملامحا لشيئ من القسوة والقوة
بتركض ع خزانتا بتفتحا وبتطالع كل شي فيا من تياب وخلافو وبتزتون ع التخت بعدين بتوقف جوات الخزانة ع الرف التحتاني بعد ما فضتا كلا وبتستناول شنتاية سفر صغيرة من فوق الخزانة بتنفض عنا الغبرة وبتفتحا وبتزت كل التياب يلي طالعتن من الخزانة فيا بتدخلون لجوا بشكل عشوائي وبعدين بتوطي تحت التخت وبتجيب كنادرا يلي حاطتا بعلب وبتفتح العلب كلا وبتحط الكنادر بالشنتاية فوق التياب
بتفتح شباك اوضتا يلي بطل ع جنينة بيتون بتطلع حواليها ع الجيران وبعدين بتاخد الفرشة يلي ع تختا وبترميا لتحت ع الجنينة
بتجيب شنتايتا يلي عبت فيا تيابا وغراضا بتسكرا منيح وبتقفلا بالقفل تبعا وبتحملا وبتزتا لتحت ع الجنينة فوق الفرشة يلي زتتا بتطلع عليها وبتطلع حواليا وبتوقف شوي بعدين بتغمض عيونا وبتنط هي من الشباك وبتجي ع الفرشة بس رجلا من الكاحل بتخبط بالارض بتتوجع بس بتبلعا.. هي ما كتير بتوجع لانو بيتون قبو اول والبيت اعلى من الجنينة شوي وفي باب منها للشارع بينطلعلوا بدرج بس مو هاد الباب الرئيسي هداك عادي من البناية وهادا قليل ما يستخدموه لهيك عالية كانت متأكدة انو رح تنجح خطتا وتقدر تهرب من الباب يلي بالجنينة لانو مارح يخطر عبال امها انو حتعمل هالشي يلي عملتو 
بتاخد شنتايتا وهي عم تعرج وبتطلع ع الدرج وبتفتح الباب وبتروح
..........................
ام عالية واخوها الدكتور عدنان بيوصلو ع البيت بعد ما عالية طلعت بالتكسي ومشيت الفرق بيناتن كان اقل من 3 دقايق
بيصف السيارة وبينزلو وبتفتح ام عالية الباب وبيفوتو
اتفضل اخي مية اهلا وسهلا زارتنا البركة يا حجي
وينا
بأوضتا 
بيروح ع الاوضة تبع عالية وبيجي ليفتح الباب بس بيلاقيه مقفول بيقوم بيطلع بأختو تطليعة عتب... لك وكمان قافلة الباب عليها لا عنجد ما حبيتا منك هي كتير هيك اي شو سجن هو الله يهديكي يارب
تعي افتحي اوام... بصوت عالي 
بتقوم بترتعب وبتركض وبتفتح الباب
بيفوت وهو مبتسم ع اساس انو حيلاقي عالية بيقوم بينصدم لما بشوف الشباك مفتوح ع سيارو والهوا عم يلعب فيه لعب فوراً بيركض بيطلع من الشباك لتحت ع الجنينة وبلاقي الفرشة بارض الجنينة بيرجع بيركض ع الخزانة بيلاقيا مفتوحة وفاضية ع الاخير عم تصفر صفر مافيا الوتكة 
بيطلع بأم عالية يلي واقفة مصفرنة
شفتي يا خانم هادا يلي كنت عامل حسابو انا هربت
ام عالية بيغمى عليها

يتبع