عالية وامها بعد ما وصلون كريم ع البيت بالليل بعد كتب الكتاب
ماما انا فايتة نام
تعي لهون قبل ما تنامي احكيلي لوين رايحة الصبح بكير اسمعت كريم عم يقلك بمرق الصبح كوني جاهزة
ماما اعملي حالك ما اسمعتي لاني مالي رايحة تصبحي على خير
لك وليه تعي لهون عم حاكيكي انا شو مالك رايحة لك لوين فهميني
ماما كريم مُصر اني كمل دراستي
اي ييييييييي والله يوم المنى
هففف ماما وانتي كمان
اي طبعاً لازم تدرسي وتتعلمي مشان تكوني من مستواه الزلمة دكتور اضرب واطرح
عالية بتزعل... هلأ هيك طلع معك... شكراً ماما.. بتنزعج وبتروح بطريقا ع الاوضة بس بتوقف وبترجع لعند امها... وعلى فكرة ما بهمني كون من مستواه لانو اصلاً انا ما حبيتو ولاني موافقة اتزوجو بس سكتت وسديت حلقي كرمالك كرمال عوضك عن يلي عملتو فيكي وقت هداك الواطي كرمال ما تتعبي او يصرلك شي بعيد الشر لانو ساعتا انا بموت وما بيعود لحياتي طعم ولا معنى.... بس اني بحبو لا ما حبيتو ولا رح حبو وما بدي حبو واصلاً مالي كتير مأمنتلو وتصرفاتو كتير زايدة عن اللزوم ومو طبيعية وامو كمان اذا بدك مارتحتلا ولا حبيتا منيح هيك هي بقيت كل شي بقلبي... تصبحي على خير
ام عالية جمدانة ببنتا
وعالية راحت ع اوضتا وسكرت الباب
........................
تاني يوم الصبح كريم عم يتصل بعالية مشان يجي ياخدا ع المعهد ويسجلا بس هي تقوم تشوف الموبايل وترجع تحط المخدة فوق راسا وتنام... مابدا ترد عليه واتصل كذا مرة بس هي ما ردت ابداً
بعدين اجا ع البيت وفتحتلو امها واستقبلتو وساوتلو قهوة وقالتلو انو عالية نايمة ومابدا تروح تسجل وياريت تتركا ع راحتا وما تضغط عليها بشي اذا سمحت مابدي بنتي تدايق منك من اولها وكمان انا بنتي بعرفها ما بتعمل شي بالغصب لازم تكون هي حابة ورضيانة
هو بيدايق شوي بس بيقلا حاضر متل ما بتأمري مرت عمي بس انا مشان مصلحتا اقترحت هالشي
بعرف بس خليا هي يلي تاخد القرار لانو هي صاحبة الشأن مو انت ولا انا
بس انا كان قصدي مشان الولاد بالمستقبل
ام عالية بتستغرب... ولاد؟؟ ع حد علمي انت بتعرف بوضع عالية كلو من اولو لآخرو
استدرك شو قال وحاول يصلح الموقف... اي يعني قصدي انو الطب تقدم ومافي شي بعيد عن رب العالمين بس الإيمان والصبر
الله يرضى عليك هالموضوع بالذات ما بتفتحو قدام بنتي ابداً رجاءً ما بدي ياها تتذكر الأذى الكبير يلي انأذتو بسبب هداك الواطي
خلص مارح ارجع افتح الموضوع بس كنت حابب استفسر انو شو الضرر يلي صار يعني الدكاترة شو قالو انو ليش ماعادت تقدر تحمل؟
ام عالية صارت تأشرلو باصبعتا انو هوس وصارت تطلع لجوا خافت بنتا تفيق وتجي وتسمع
بصوت واطي... رح الك هداك يلي ما بيتسمى الله لا يباركلو يارب لما ضربا وهي كانت حامل صار يرفسا بطنا ولي عليي شو تعذبت.. ااااااااااه... سكتت ورجعت كملت فا مات البيبي ببطنا ومن أثر الضرب تضررو المبايض واضطرو يشيلو واحد منون تماماً والتاني شالو قسم منو مو كلو وقالولا مابقى فيا تحمل يعليي عليها
كريم بيسكت وما بيحكي وبيكمل فنجان القهوة
.....................
كريم طلع من بيت عالية بيركب سيارتو وبيروح ع بيتو
......................
الضهريات بتتصل ام كريم وبتعزم عالية وامها ع الغدا
طبعاً بيلبسو وبيروحو ع الموعد وبتكون اخت كريم نورا موجودة ع الغدا بيتغدو وبدردشو وام كريم بتصير تحكي مع عالية عن لبسا وهنداما يلي لازم تزبطو شوي وتغيروا لانو ابنا عايش برا وعم يشوف اشكال الوان يعني مالا حابة طريقة لبسها الكنزات العريضة والطويلة فوق البنطلونات.... طلبت منها تلبس شي أنثوي متل الفساتين والتنانير وهيك شغلات تبين الأنوثة تبعا
يعني بنتي انتي حلوة ماشالله وناعمة كتير وجسمك بياخد العقل حرام تخبيه
عالية ما ردت بولا كلمة لأنها انزعجت كتير
كريم طول فترة وجود عالية وامها كان مشغول من بعد الغدا اجاه اتصال استأذن وفات ع اوضتو وضل ساعات طويلة حتى انو عالية وامها راحو لحالن وهو بعدو بأوضتو وما طلع منها مع انو امو دقت عليه الباب وهو تحجج انو معو تلفون مهم كتير بخصوص المستشفى والشغل بفرنسا وطلب منها تعتذر منهن
طبعاً عالية وامها بيرجعو ع البيت
لك بنتي شبكي ملئومة من وقت ما رحنا ولهلأ مو ع بعضك شبكي؟
ماما انا التلك اني مو مرتاحتلو لا هو ولا امو بس انتي ما بدك تصدقي
وبعدين ما شفتيلي امو المفزلكة شو بدا
قال البس شي أنثوي قال اي شو شايفتني عم بلبس طقومة رسمية بكرافة
بنتي المخلوقة معها حق يعني بدا ياكي بأحسن مظهر قدام جوزك وهادا الشي لا عيب ولا حرام بالعكس حبيت هالحكي منها كتير خايفة عليكي هي وعم تحكي مزبوط من ناحية انو كريم شايف اشكال الوان بقى لازم تهتمي بحالك اكتر من هيك
الحشمة واللبس المستر صارو شرشحة هلأ؟؟ ولبس مو أنثوي مو؟
حبيبتي مو ضروري اللبس المستر والمحتشم يكون بهادا الشكل عادي ممكن تكوني مسترة بس اكابرية
اي نشالله
انا فايتة ع اوضتي ارتاح تعبت من هاليوم البايخ
الله يهديكي
............................
بيمر اسبوع وكريم بيحدد سفرو وامو بتعمل عزيمة لعالية وامها وبعض قرايب كريم مشان يودعوه لانو مسافر وبدو يغيب سنة ونص
بيجو الكل وكلن ييجيبو بناتن معون وكل البنات صبايا حلوين وهاي كلاس كتير
وام عالية بتتجاكر لان كلن مرتبين واكابر وعم يمزحو ويضحكو مع كريم
بس عالية ما بهما ع اساس لكن هي عم تتطلع بطرف عينا ع كل وحدة وهيئتا متجاكرة منون
بيمضى هادا اليوم وكريم تاني يوم بسافر
.........................
عالية بفترة غياب كريم بتدرس بكالوريا بتسجل بمعهد وبتصير رايحة جاية كل يوم والدراسة بتصير كل هما
وليد بيضل مراقبا عن بعد بدون ما يقرب عليها بس من بعيد لبعيد وما بورجيها حالو ابداً
.........................
بيمضى ست اشهر على غياب كريم وبيصير وقت الفحص تبع عالية
عالية عم تدرس بالبيت وتحضر للامتحان
ام عالية عن تلبس يبدو رايحة لمطرح.... عالية ماما انا رايحة بدك شي مني
لا ماما سلامتك بس لا تطولي وخدي موبايلي معك
لك بنتي يعني جوزك جبلك موبايل وخط جداد لك ليش ما استعملتين روحي افتحين هلأ حطي الخط بالجهاز خليني اتصل واطمن عليكي بلا ما ضل مقطوعة عنك كل الوقت
ماما مابدي افتحو اذا بتريدي انا هيك مبسوطة
طيب كيف بدي اطمن عليكي
انا تمام لا تاكلي همي حضل عن بدرس اصلاً ماضل للفحص شي دوبني لحق
ااااخ بس لو التلفون كان شغال بس شبدنا نعمل يضربو هنن وخطوط التلفون بدون الف سنة ليوصلوها
خلص ماما روحي وانتي مطمنة بس لا تطولي
اي تؤبريني بخاطرك لكن
الله معك
باي
باي
...........................
عالية عم تدرس بيندق الباب
ماما افتحي بالمفتاح بلا ما قوم
مافي رد
بيرجع بيندق الباب
بتقوم عالية بتفتح الباب وبتتفاجأ بوليد بوشا
لك انت شو جابك لهون.... وبتحاول تسكر الباب بس هو بيحط رجلو جوا وبيدفش الباب وبيفوت لعندا وبسكر وراه
لك يا كلب طلاع من بيتي
خرسي وليه ووطي صوتك احسنلك
عالية بتنادي.... ماما مامااااااااا
ههه لا تسلبيا وليه بعرف انو امك مو هون انا عم راقبكن واصلاً شفتا لما طلعت يا جدبة
شبدك انت هلأ شبدك مو انتهينا خلص
لا مانتهينا لسى في الي حساب عندك
لك انو حساب الله ياخدك
شوووووو رح تتجوزي وما حدا قدك يا واطية
لك ماحدا غيرك الواطي
ليكي وليه بدك تعطيني كل هالذهبات يلي لابستين يلا اشلحي من ايدك
لك ما فشرت عينك...... بتصير تدفشو
بيندق الباب
عالية بتموت من رعبتا وبتخبي وليد بالمطبخ لانو هو ورا باب البيت
بتفتح بتطلع حنان
لك وينك يا بنت والله انشغل بالي عليكي مالك مبينة صرلك كم يوم يعني مين شاف حبابو نسي صحابو كأنو ما
لك شبكي شو حتخليني واقفة ع الباب
عالية متلبكة كتير ووشا اصفر.... لالالا اتفضلي اهلا وسهلا
وليد بينبئ راسو من المطبخ
عالية وحنان بيفوتو ع اوضة عالية وبتطلع عالية ع اساس تجيب لحنان مي وعصير
بتفوت ع المطبخ وبتحاول تطالع وليد
لك الله لا يوفقك رح تجبلي مصيبة انت لك انقلع قبل ما تشوفك
ما بطلع لتعطيني خاتم ا اسوارة
لك الله لا يباركلك بجاه النبي
خرسي وهاتي والا والله العظيم بساويلك فضيحة الها اول ومالها اخر فهمانة وليه
عالية بتشلح من ايدا اسوارة وبتعطي ياه... خود وانقلع ولا عاد تورجيني خلقتك
لا هي ما بتكفي هاتي وحدة كمان بيشلحا اسوارة تانية
لك الله لا يوفقك يارب
بيحمل حالو وبيطلع من البيت بسرعة وهي بتبكي وبعدين بتمسح دموعا وبتفوت لعند حنان
................
يتبع
