أمير طعيمة كتب رسالته عبر حسابه على موقع التواصل الاجتماعي Facebook للتعقيب على خطبة كل من مبارك والعادلي، التي أذاعها التليفزيون المصري الأربعاء، أثناء محامتهما.

وعلق طعيمة قائلا: "الفرق بين ثورة و نتائج ثورة فرق كبير، و عشان محدش يتوه و دماغه تتلخبط عشان تعرف الثورة كانت حق و لا باطل هو سؤال واحد تسأله لنفسك هل الثورة كانت علي نظام يستحق الاستمرار لما أنتجه من عدل و حرية و مساواة و حياة كريمة لكل أبناء شعبه مش بس لفئة معينة ؟ أم كانت الثورة علي نظام ظالم و فاسد ؟ إجابتك عن السؤال ده تخليك تعرف أصلا الثورة دي كانت حق و لا باطل".

وتابع: "أما نتايج الثورة فدي حاجة تانية خالص، ممكن تكون الثورة حق بس لو أجهزة الدولة العميقة و رأس المال الفاسد و الاعلام الموجه بالاضافة لنسبة جهل مرتفعة ممكن كل دول يخلوا نتايج الثورة زي الزفت، ساعتها السؤال هي الثورة اللي العيب فيها ؟ و لا الريح أقوي من إن الثورة تؤتي ثمارها ؟
أبسط الموضوع: لو أنا مثلا مدرب كرة قدم و وصلت بالمنتخب القومي لكأس العالم و إتولي مدرب تاني المسئولية و في أول مباراة في كأس العالم إتغلب المنتخب ١٠-٠ هل أبقي أنا المسئول عن الفضيحة دي عشان وصلت بالمنتخب لكأس العالم ؟!".

ووجه رسالة لوزير الداخلية الأسبق قائلا: "انت شخص ظالم و مفتري و بحجة الحفاظ علي الأمن أهنت الناس و ظلمت ناس كتير و المحافظة علي الأمن مش مبرر للقمع و الظلم و فيه دول كتيرة آمنة بتحترم شعبها، و الراجل القوي اللي يقول كلمة الحق في أي وقت و أي نظام، و انت ما قلتش كل اللي قلته أول إمبارح قبل كده، و كنت هحاول أحترمك لو قلت خطبتك العصماء دي في وقت حكم الاخوان، مش تستني لما يمشوا و تعلق كل خطاياك علي شماعتهم و تحسسنا انك كنت الملاك البريء و إحنا اللي ظالمينك".

ووجه رسالة لمبارك قال فيها: "أنا متعاطف معاك في السن، و أبقي ظالم لو قلت ان من أول يوم في حكمك لآخر يوم ما قدمتش أي حاجة لبلدك، بس التاريخ بيحكم بكفتين مش كفة واحدة، كفة فيها انجازات الشخص و كفة فيها اللي فشل فيه، و وجهة نظري في الموضوع ده معروفة".

وختم رسالته قائلا: "هل ستتاح لكل الناس اللي بيتحاكموا فرصة إلقاء خطبة زي الخطب دي تنقلها القنوات ؟ ليه قلتم خطبكم في الوقت ده بالذات و انتم بقالكم أكتر من ٣ سنين بتتحاكموا علي نفس التهم ؟ هل الشعب المصري أخطأ لمجرد إنه كان عايز يعيش أفضل ؟ هل هناك مانع قانوني إني المواطن البسيط يحصل علي أمنه و إحترامه في نفس الوقت بدون مقايضة ؟".