هل من الطبيعي انو الواحد يعدي بحياتو كم سنة خوف؟..

هل كل الشعوب والبشرية من بداية التاريخ لهلق عم تشعر بمشاعرنا وعديت بنفس الظروف؟..

اللي عم يمر فينا طبيعي؟.. نحنا طبيعيين؟..

هل كل إنسان لازم يعدي بهيك ظروف ويختبر هالكابوس و السلسلة الطويلة الغير منتهية من المشاعر الحارقة ؟..

هل من الطبيعي انو الواحد ينام بالممرات أو بالأحرى ما بيقدر ينام ويحيط فيو شبح الموت من كل مكان وبيموت ألف مرة وهو عم يشوف ولادو مرعوبين؟..

هل من الطبيعي انو كل طفل بالعالم لازم يعرف يميز بين أصوات القذائف ويعرف أسماء كل الصواريخ والأدوات الحربية؟..

هل من الطبيعي انو الأم تحتار كل يوم وكل ليلة تبعت ولادها عالمدرسة ولا لا.. وتخاف إذا راحو ما يرجعوا؟.. والأب يتم عم يتسأل طول الوقت صار وقت الهجرة ولا لا؟..

هل من الطبيعي انو الدنيا كلها طبيعية.. وهو الشعب الوحيد اللي عايش بخطر ومحروم من الكهربا والمي وكلشي أساسي .. والأنكى من ذلك انو ما حدا حاسس فيو من كل سكان الكرة الأرضية بالمرة؟..

هل من الطبيعي انو كل دولة لازم تعدي بظروف ومآسي يتشرد بسببها أكتر من نص الشعب ويتشوه نفسياً كل الشعب ويتدمر كل آثارو وأغلب مبانيه ؟..

هل من الطبيعي انو الواحد يصل فيو الخوف من انو يفتح الأخبار ويشوف حدا من أهلو أو يلاقي بيتو بخبر كان؟..

هل من الطبيعي انو الواحد يختبر بحياتو شعور الغربة القسري وما بيقدر يفكر لمجرد تفكير أو يحلم انو ممكن يرجع؟..

هل من الطبيعي انو كل فرد من البشرية لازم يبني ويشتغل ويتعب عحالو ووقت يبلش يرتاح نقلّو يالله مع السلامة انسى كلشي بنيتو وروح على غير بلد وبلش مو من الصفر من تحت الصفر.. لانو بدو يتعلم لغة متلو متل الطفل الصغير؟..

هل من الطبيعي انو الأهل يكونوا ببلد وكل ولد ببلد.. ويتجوزوا ويجيبو ولاد.. وتمر سنين ويكبروا هالولاد .. وما بقدروا يلتموا ويشوفوا بعض ليوم واحد ولا حتى بشي جزيرة نائية؟..

هل من الطبيعي انو أغلب مواطنين الدول لازم يتفرقوا ويتشردوا ويذوقوا الويل وينتشروا ويصيروا ببلدان ما كنا منعرفها حتى على الخريطة؟..

هل من الطبيعي ؟ هل من الطبيعي؟.. ألف سؤال وسؤال ما عم لاقيلن جواب .. و أصلاً من سنين وأنا ما عاد عرفت كيف بيكون الإنسان طبيعي..

#ميس_بازرباشي

#save_aleppo