من زمان وقت كان الرجال يروحوا عالشغل الصبح يجتمعوا 

نسوان البناية الساعة تسعة.. وبدون موعد مسبق عند شي 

جارة ويشربوا مع بعض قهوة الصبح...بكل بساطة بينزلوا 

بلبس البيت ..ويربطوا شعرون..او يتركوا اللفاليف عراسون

ويجتمعوا..وباكتر الحالات صاحبة المزاج العالي هية الي بتجيب 

معها ركوة القهوة ..وصاحبة البيت بتضيف جارتها شي 

مما حضر..رز بحليب..فواكة..قطعة كيك..اي شي موجود بالبيت..بيقعدولن شغلة ساعة 

ساعتين بالكتير وبتنفض الصبحية وكل وحدة عشغلها وطبخها..وتمت هالعادة اللطيفة 

لوقت كتير طويل ..لبين ما اتغير المضمون وبقي الاسم عحالو... فالصبحية هلق 

حافظت على توقيتها الساعة تسعة الصبح....بس بتوقيت نيويورك وضواحيها...بعزيمة 

مسبقة من قبل باسبوعين على اقل تقدير..وطبعاً الاكابر بيتأخروا على الاقل ساعتين عن 

الموعد الاصلي...مما يضطر صاحبة البيت تقول عموعد وهمي قبل ساعتين من الموعد 

الاصلي..مجارةً للاكابر..بتبلش صاحبة البيت بالتحضير للصبحية قبل بأسبوع..بتبلش 

بالتعزيل (يرجى مراجعة بوست التعزيل)..تجهيز الكبة ( والي رح تكون موضوع بوست 

قادم )..بتحط لائحة البوفيه..وبتبلش تكتب قائمة اللوازم...الي بتكون طويييللللة 

وبتحتوتي اسماء معلبات غريبة وغير مألوفة لصاحب البيت..فبيفكر انو المعازيم من دول 

شرق آسيا او من جزر الكناري...المهم بيشتري الغراض وبيدفع..وبيخلص دورو...بينما هيه 

بتشتغل وبتطبخ وبتزين لحتى يجي اليوم الموعود..وبتفيق قبل الشحادة وبنتا..وريحة 

الاكل الدسم والقلي بتصل لآخر الحارة...بتخلص شغلها ولبسها وبتجهز ركوة القهوة الي 

هو "عأساس الضيافة الوحيدة" هيك بيقولولها النسوان لما بتدق بتعزمن...مع ضحكة 

خبيثة..."قهوة بس مابدنا نعذبك" ... بعد مرور اول ساعة من بعد الموعد الاصلي بيدق 

اول جرس...اول الحاضرات..يمكن لانو الكوافير تبعها كان فاضي او بيتها قريب من شان 

هيك وصلت قبل... بتدخل وبتستغرب من روايح الاكل "عأساس فنجان قهوة بس" اي اذا 

بس فنجان قهوة ليش لابسة بدلة من جهازك.. وشعرك شنيون وطول الكعب اعلى من 

برج ايفل!!! ..

بتقعد اول ضيفة مع صاحبة البيت وبتتذمر من تأخر باقي الشلة " عأساس هية كتير 

دقيقة وبتحترم المواعيد" بعد مرور ساعة تانية بيرن الجرس وبتبلش هالنسوان تتدخل 

..وريحة البارفانات والسبراي بتغطي عريحة القلي...وكلو كان بعرس وطلع برانية 

عالصبحية...الوان صارخة..اظافر مدهونة..لبس متكلف لا يتم للعفوية بصلة...هون 

بنقدر نصنف المعازيم لاكتر من صنف... _وحدة راكزة بتلبس دائماً طقومة 

رسمية..بمكياج خفيف وتسريحة بسيطة... _وحدة مصروعة بتحب الفاشن والاكشن 

والالوان الصارخة..بتحمل شنته موديلها غريب وبتلبس لبس اغرب.... _وحدة نحفانه من 

جديد بعد ريجيم قاسي ومرير..بتلبس ديق لتستعرض نتيجة تعبها وعذابها المرير...غالباً 

بيكون حديثها كلو عن الرجيم والرياضة والرشاقة _وحدة صحة وغالباً بتكون ضحوكة 

ومسلية ومابتفرق معها شي..بتحكي عن الاكل والدهن والكش والشوي والسمن والحلو 

العربي الي عأصولو... _وحدة متدينة بتلبس شرعي وبتزور كل الموجودين وبتمتعض من 

ملابسن وبتنتقد هالجمعات الا دينية رغم انها بتحضرون كلون ومابتفوت عزيمة.... _وحدة 

معجوقة وبتحكي كتير وطرارة من صبحية لصبحية..هي يا إما بتجي بكيييير وبتقوم قبل 

الاكل او بنص الصبحية وبتكمل ..من شان تلحق صبحيتين بنفس اليوم..وهي طبعاً 

بتعرف أسماء كل المعازيم وازواجن...وبيت احماهن ونانة نانتون وجوز ابن خالة عمتن 

..مابتفوتها الفايتة..بتكون موجودة بكل روحة وعرس..وعندها كل احاديث البلد واخبارو.. 

_وحدة خجولة وكتومة..بتجي وبتروح ومابتحكي كلمة.. _وحدة قادرة وقوية..بتحملك مية 

جميلة انها اجت مع انها متقاتلة مع فلانه المعزومة ومابتجتمع معها بنفس البيت...وغالباً 

بتكون رئيسة الجمعية..وزعيمة العصابة.. _وممكن يلتقى كم وحدة مفروضة عزيمتن 

عصاحبة البيت..بيجو بيقعدوا بالصدر ..وبيبوزموا ومابيعجبهن العجب....

_ووحدة كان عندها عرس قبل بيوم بيكون شعرها شنيون ومكياجها من امبارح ..وطبعاً 

بتستلم الحديث..بتحكي وبتشرح كل تفاصيل العرس.... وكتير كتير من  

التصنيفات..ماعلينا....المهم ....بتبلش الصبحية المرتقبة وبتجي صينية القهوة 

الغالية...مع الفناجين الاصلية..وطبعاً لابد من فزلكة البعض..شي بدو سكر اقل ..شي 

سكر ينغلى مع البن..شي بوش...شي بدو نسكافيه..وصاحبة البيت بترجع الصينية 

عالمطبخ وبتشتغل بالطلبات السبيشل ..معلومكن الفرن ملان طناجر..وبصعوبة بالغة 

لقدرت تعمل القهوة اول مرة...بيندمجوا هالنسوان بالحديث...تاركين صاحبة البيت غرقانة 

بالمطبخ...وعم تركض بين الطناجر وبين خدمة الضيوف...تشيل كرسي وتحط 

كرسي..تفضي التباسي ..(جمع تبسية وهو مصطلح حلبي ما بعرف شو اصلو يعني 

نفاضة السجائر)..تشيل الفناجين الفاضية..بتضيف شوكولا..بتفتح الباب..بتأهل وتسلم.. 

بتشيل الجاكيتات..بتدل عمكان الحمام...والا ماوحدة بدها تفوت عغرفه النوم تبدل 

لبسها..وهي بدها حمرة لانو انتزعت..وهي بدها تصلي وبدها غراض الصلاة ومابتعرف 

وين القبلة..ووحدة عم تحكي عالموبايل جوا من شان الصوات..ووحدة عم تاخد كم صورة 

سلفي عالمراية..وصاحبة البيت رايحة جاية بالكعب العالي والابتسامة العريضة متل 

مضيفات طيران الامارات...وبالصالون شغالة الاحاديث المتتداخلة وبكتير من الاحيان 

الاغاني والرقص.....هيك لحتى تعلن صاحبة البيت عن جهوزية السفرة...الي كانت عم 

تنحط على اعين ومرئ كل الحاضرات... .. __وااااااو ليش معذبة حالك ..مو اتفقنا فنجان 

قهوة بس...!!! _ يييي هلق رح ينتزع ريجيمي...طبعاً هي هية كلمة السر للبدء بالاكل...